Tórstein Niclasen, Miðvágur, varð føddur 10. november 1916 og andaðist 04. desember 1998
Hann var sonur Rasmus Niclasen ættaður úr Norðurstovu í Sørvági og Henrikku Danielsen.
Tórstein giftist við Sunnevu Sybillu Olsen av Kringrutagarði á Sandi, (1918 – 2015) og tey fingu 7 børn: Christina 1941, Elisabeth 1943, Rasmus 1949, Jóna 1953, Marjun 1956, Sigga Maria 1959, Jóannes Magnus 1962.
Pápi Tórstein, Rasmus, var giftur tvær ferðir. Fyrra konan var Marianna Heinesen (1866 – 1906). Tey fingu tvær døtur. Sigga Maria, vanliga nevnd Minni (1900-1978), sum giftist bornholmara og búsettist í Canada. Johanna Sofía (Fía) (1899-1954), giftist eysturríkaranum Bugatsh og búði í Havn.
Seinra konan hjá Rasmus var Henrikka E. Danielsen, vanliga nevnd Dikka á Bakkanum (1883-1973), ættað úr Beitinum í Miðvági. Dikka á Bakkanum var systur Mikkjal á Ryggi og Dagmar Joensen Næs.
Rasmus og Henrikka fingu 3 børn. Margret, (1910-1962), Marin Margreta, sum doyði ung einans 23 ára gomul í 1936. Tórstein var yngstur og bert 4 ára gamal, tá pápin doyði í 1920.
Tórstein var føddur uppi í Hús. Pápin, Rasmus, hevði handil – og reiðaravirkið – niðri á bakka. Tann handilin brann í grund í 1913. Og Rasmus fór so at handla har sum Andrias Joensen seinri hevur havt handil.
Í húsinum niðri á Bakka, har Dikka sat sum einkja við fimm børnum, var fitt av jørð, so tey høvdu bæði neyt og seyð. Men har var eingin vaksin í húsinum at hjálpa til, so hjálpin kom uttan frá.
Tá Tórstein kom til mans, tók hann sær av tí sum kravdi ein mann. Hann fór sum ungur at arbeiða sum smiður hjá Harald Joensen, (Harald á Sjómansheiminum), samtíðis sum hann tók sær av tí, sum jarðarognin kravdi.
Tórstein og Sunneva giftist í 1941, tey búðu inni á Bakka og fluttu í egin hús á Tórsteinsmørk í 1950. Tórstein arbeiddi tá sum smiður, og var íðin innløgumaður.
At søkja bjørgini kravdi sín mann, Miðvingar áttu bjørg norðan til á oynni. Hetta vóru bjørg sum ikki vóru so løtt at søkja, mest var tað frá báti, men onkur pláss vóru, hvar farast kundi frá landi av.
Teir tóku lunda og egg tá farið var at draga, Seinri var fari á fleyg. Hetta kundi ofta vera vandamikið arbeiði. Túrarnir úti í Tindhólmi vóru partvís útferð túrar, tí har vóru onkuntíð konur og børn við.
Tórstein var væl kendur við bjørgini hjá Miðvingum og við Tindhólm, og av somu grund heitti Niels Juel á hann um at koma og siga frá um fuglaveiðu og seyðaskorar í Miðvágsbjørgunum og um Tindhólm.
